كيف تبدا التعامل الامن في البورصه

maghraby1952 · 30-07-2007, 06:58 PM

وصلني هذا السؤال علي الخاص واكتب ردي هنا ايضا من واقع معرفتي المتواضعه ليستفيد الجميع والقسم التعليمي فيه الشرح الوافي وشركات السمسره

اول حاجه رقم قومي عندك
تاني حاجه حساب في البنك اللي هيبقي امين الحفظ بتاعك يعني بيحتفظ بالفلوس والاسهم ويجمد الفلوس لامر شراء عاوزاه او يجمد الاسهم الللي عاوزه تبيعيها
وبعد ما تفتحي الحساب البنك ده بيعمللك التكويد بتديله الرقم القومي وحوالي 30 جنيه بيعمللك كود موحد باسمك كل تعاملاتك بتبقي بالرقم ده
تالت حاجه السمسار او شركة الوساطه الماليه وفيه دلوقت تداول بالنت
انا ما اعرفش بلدك فين
ولكن انا حاليا مشترك مع بنك اسكندريه ولهم شركه تبعهم للوساطه بدون نت وحاجه ممله بس الايطاليين هيعملوا النت قريب
اما انتي فارشحلك العربيه اونلاين للتداول بالنت وبنك الحفظ هو العربي الافريقي الدولي او التجاري الدولي
وتلاحظي ان الشركه ما بتاخدش الفلوس في ايديها خالص تخصم بس العموله 3 ونصف في الالف
والبنك 1 في الالف عموله
اقل مبلغ 50 الف في الحساب
ومش لازم دلوقت اشتراك شاشه لحظيه 100 ج في الشهر لحد ما تاخدي خبره وممكن تدي الاوامر بالتليفون او الفاكس
علي فكره العربيه او لاين ممكن تعمل كل حاجه بالنيابه عنك فتح الحساب والتكويد وكله
لا انصحك بالمضاربه في البدايه لحد ما تاخدي خبره وتذاكري
ولكن تبداي باسهم تقيله محترمه مضمونه ولها عائد ثابت كاستثمار
حاليا المناسب هو
سيدي كرير17.60 ج
كريدي اجريكول 17.30 ج
بنك التعمير والاسكان 40 جنيه
عز الخيله 1015 ج والاتصالات 17.40
جنوب الوادي 13.40
اموك
اسمنت قنا

ابعدي عن الاسهم اللي عليها هيصه حاليا وتضخمت زي الاسكانات والمنتجعات والنسيج
وابعدي عن شركات خسرانه او فيها تلاعب هي الكابلات والزيوت المستخلصه والنيل حليج ودلتا للانشاء او مشاكل في حصة الدقيق زي المطاحن
كمان بعض شركات الاسمنت كويسه والسويدي للكابلات لو نزل شويه

ملحوظه هذه وجهة نظر شخصيه معتمده علي تحليل مالي واساسي للشركات ولا تعتمد علي اي تحليل فني للمضاربين يعني هي للمبتديئ والمستثمر
كما انها ليست دعوه او توصيه للبيع او الشراء وكل واحد مسئول عن قراره وغير مطلوب من احد التعليق علي اي اسهم مذكوره التعليق او الرد يكون في سياق العنوان وهو كيف تبدا التعامل بالبورصه حتي لا نخرج عن الموضوع وليستفيد السائلين
مع الشكر

maghraby1952 · 30-07-2007, 06:59 PM

شركات اخري للتداول بالنت
هيرمس وهم نفسهم امين الحفظ
والتجاري الدولي للسمسره والبنك هو التجاري الدولي مصر
واراب فاينانس وغيرهم اعتقد 2 كمان
وشركات السمسره كتير جدا ممكن 40 شركه
البنوك امينة الحفظ ايضا عديده بس كل شركه لها امين الحفظ بتاعها

maghraby1952 · 30-07-2007, 06:59 PM

هناك موقعين مهمين انصح الجميع بدراسة الشركات قبل الدخول فيها للاستثمار موقع بورصتي القاهره والاسكندريه وموقع مباشر قسم البيانات التحليليه اللي بيضارب لا يهتم بذلك انا عارف

http://services.mubasher.net/(j1coe2...)/Default.aspx

http://www.egyptse.com/

maghraby1952 · 30-07-2007, 07:00 PM

وفيه حل تاني للي خواف قوي او المبلغ عنده اقل من المذكور هو صناديق الاستثمار في اسهم السوق المصريه وهي عديده ولكن حسب اخر نتايج فيه صندوق تبع بنك كريدي اجريكول محقق احسن نسبة ارباح

maghraby1952 · 30-07-2007, 07:01 PM

فيه مرجعين محترمين جدا للي عاوز يبقي مضارب
جون ميرفي technichal analysis
وكتاب موسوعة الشارتات الناشر وليس المؤلف ويليسencyclopedia of charts
مع ملاحظة الحذر في اسواقنا العربيه من المتلاعبين اللي بيرسموا حركة السهم زي ما هما عايزين ويوظفون العديد من السماسره واعضاء المنتديات للتاثير وتوجيه السوق حسب ما يريدون ولذلك انا اقنع بمكسب قليل استثماري في اسهم مدروسه كويس لان المضاربه ممكن ربح للخبير وممكن خساره اكتر من نصف راس المال للي ما عندوش الخبره وبعد اكتساب الخبره المطلوبه ممكن الواحد يضارب بربع المبلغ اللي في المحفظه والنصف للاستثمار والربع سيوله لاصطياد الاسهم اللي يطلع عليها فجاه اخبار كويسه

maghraby1952 · 30-07-2007, 07:02 PM

كيف اختار الشركه اللي هاستثمر فيها

اعتبر نفسك نزلت تشتري اي حاجه من السوق سلعه يعني والسهم ما هو الا حصه تمتلكها في شركه يعني سلعه لازم اشوف قيمة السهم يساوي ما يدفع فيه والا لا
وهنا تيجي الدراسه الماليه
راس المال وعدد الاسهم والقيمه الاسميه والدفتريه والسوقيه
ومعدل نمو ارباح الشركه مهم جدا
وربحية السهم وتوزيعاته او توزيع الاسهم المنحه
ومكرر الربحيه
تاني حاجه الاداره او اصحاب الشركه وسمعتهم الاخلاقيه البعض يتلاعب في اسهم الشركه بتاعه زي ما انتم عارفين
ثالثا حجم الشركه واهمية منتجاتها
رابعا مستقبل الشركه وخططها المستقبليه

maghraby1952 · 30-07-2007, 07:03 PM

نقطة دخول السهم اللي انا اخترته مهمه جدا عشان ما اشتريهوش وهو غالي واتحبس فيه
هنا دور التحليل الفني ودراسة حركة السهم في ال 3 سنوات الاخيره من الموقعين اللي ذكرتهم
لو هاتضارب زي انا ما قلت انا لا افهم في المضاربه حتي الان وما زلت اذاكر قبل البدايه بربع المحفظه كما ذكرت
انما انا باتكلم للمبتديئ والمستثمر للدخول الامن في السوق
هناك ما يسمي القاع لكل سهم وهو اقل سعر للسهم في فتره معينه سنه مثلا وبيقولوا عليها نقطة الدعم
وهناك القمه التاريخيه او اعلي سعر وصل له السهم في سنه مثلا بدون توزيعات اسهم منحه او اسهم اكتتاب او تجزئه اللي لازم يتعمل حسابها في احتساب قمة السهم او ما يسمي المقاومه
والتحليل الفني بيدي 3 نقاط للدعم و3 نقاط للمقاومه
والافضل دخول السهم قرب تاني نقطة دعم لما السعر يبدا يزيد من عندها
والبيع عند نقطة المقاومه الثانيه لما السعر يبدا ينزل من عندها
بالنسبه للمستثمر ممكن الواحد ما يهتمش بكامل الدقه بهذه الشروط ولكن احسب السعر المناسب للدخول قرب القاع والمستهدف لمكسبي من السهم واحتفظ بيه لحد ما احقق المكسب المطلوب او اقنع بما وصل اليه
وبصفه عامه للمستثمر ربح 20-30 % نسبه مقبوله للربح في الاسهم التقيله الدفاعيه في 4 شهور الي سنه
ويلاحظ ان السوق دايما فيه فرص جديده كل يوم والواحد يراقب الاسهم اللي اختارها حسب ما ذكرت ويشوف الوقت المناسب لدخولها
وتمنياتي للجميع بالمكسب الوفير

maghraby1952 · 30-07-2007, 07:04 PM

اخر نصيحه لا تشتري علي الاشاعه اللي بيقولوا اشتري علي الاشاعه نصابييييين
لازم الخبر يكون من محضر جمعيه عموميه للشركه او موقع البورصه الرسمي او احد المواقع المحترمه زي مباشر او شركة مصر لنشر المعلومات وهذا رابط الاخير

http://www.egidegypt.com/

maghraby1952 · 30-07-2007, 07:05 PM

موضوع نصب تاني
البعض من السماسره يروجوا ان السهم الفلاني هايتجزا وانه يعني ده خبر يزيد من سعر السهم
ودي مقولة نصب واحتيال
تقسيم السهم لا يعني اي شيئ سوي ان الاسهم اللي سعرها كبير قوي لما تتجزا ممكن يزيد التداول عليها بس ده لا يعني انها ممكن تزيد وعندكم امثله كتير زي كرير وتليكوم

maghraby1952 · 30-07-2007, 07:07 PM

لمحه تاريخيه

--------------------------------------------------------------------------------

في عام 1917 اسس الاقتصادي المصري العبقري محمد طلعت حرب باشا بنك مصر والشركات التابعه له واهمها شركة مصر للغزل والنسيج في بلدي المحله الكبري علي مساحه هائله هي مدينه صناعيه عالميه عملاقه بها الان الشركه يعني 45الف عامل
كيف تم ذلك
اراد الاقتصادي الوطني ان ينهض الاقتصاد المصري بيد ابنائه واموالهم فكانت فكرته العبقريه بان تكون تلك الشركات شركات مساهمه يساهم فيها كل ابناء مصر لبناء اقتصاد قوي ووصل اقتصاد مصر وقت الحرب العالميه التانيه من القوه ان الجنيه المصري كان يساوي جنيه دهب 8جرام يعني زائد 2.5 قرش و كانت هناك شركات لرجال اعمال مصريين كثير مثل مصنع السكر وياسين للزجاج في سمنود وشركات قطاع خاص للنسيج في المحله عديده وغيرها في كافة ربوع مصر

الي ان جاءت الثوره
وفي عام 1961 قام عبد الناصر بالتاميم ومنها شركة المحله
كنت صغير وكان صديق للوالد اسمه عبد المعطي الصيرفي رحمهما الله ياتي عندنا في الدكان ولا يتوقف عن السباب في عبد الناصر
والوالد يجيب له القهوه ويضحك معه ولا يغادرنا الا وقد انشرح صدره من حديث الوالد
الحاج عبد المعطي كان من اللي الثوره بتسميهم عاطلين بالوراثه حط كل مدخراته في اسهم شركة المحله واشتري من زمان السهم بجنيه
وقت التاميم كان قيمة السهم 10 جنيه ايام الجنيه الخشب وقتها البيضتين كانو بتعريفه 5مليم يعني
عمل ايه عبد الناصر
امم شركة المحله
وقال هيعوض الناس اصحاب الاسهم بالقيمه الاسميه فقط يعني السهم قيمته 10 جنيه هايدفع جنيه واحد بس
طب يابا الحاج فين الجنيه
قاللك اه خدوا سندات ورق يعني وتصرفوها بعد كام مش فاكر 15 او 20 سنه
الحاج عبد المعطي كان عنده 15 الف سهم قيمتهم في السوق 150الف جنيه وعايش علي ارباحهم ملك زي انور وجدي كده لما كان بيطلع بيه
وفجاه لقي نفسه معاه شوية ورق يصرفهم بعد 15 او 20 سنه وبما يعادل واحد لعشره من حقه

ندعو الله الا يعيد ايام التاميم هذه مره اخري
لماذا احكي هذه القصه الدروس والعبر يعني هي مشاركتي القادمه بكره علي خير بامر ربنا

كيف تبدا التعامل الامن في البورصه

= مـنـتــدى الـتــحـلـيـل الـمــالـي