 رد : إستراحة منتدى د / جيهان .. مش هتقدر تبربش عينيك
من أجمل قصائد شاعر العامية المصري
عبد الرحمن الأبنودي
قصيدة يامنه
**************************
يامنه
و الله و شبت يا عبد الرُّحمن ..
عجّزت يا واد .؟
مُسْرَعْ؟
ميتا و كيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
و مرة .. وروني صورتك في الجورنان
قلت : كبر عبد الرحمن.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
و ماتت فاطنة ابْ قنديل
و اتباع كرم ابْ غبّان
و انا لسة حية..
و باين حاحيا كمان و كمان.
عشت كتير.
عشت لحد ماشفتك عجّزت يا عبد الرحمن.
و قالولي قال خَلَّفت
و انت عجوز خلَّفت يا اخوي؟؟
و بنات..!!؟
أمال كنت بتعمل إيه
طيلة العمر اللي فات؟
دلوقت ما فوقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمن.
أهو عشنا و طلنا منك بصة و شمة.
دلوك بس ما فكرت فى يامنة و قلت: يا عمة؟؟
حبيبي انت يا عبد الرحمن
والله حبيبي .. وتتحب.
على قد ما سارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك و عويْلاتك
ولاّ شبهنا..؟
سميتهم إيه؟
قالولي : آية و نور.
ما عارفشي تجيب لك حتة واد ؟
ولا أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!
و لسه يامنة حاتعيش وحاتلبس
لمّا جايب لي قطيفة و كستور؟
كنت اديتهمني فلوس
اشتري للركبه دهان.
آباي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة و لا أغراب.
خليهم..
ينفعوا
أعملهم أكفان.!!
كرمش وشي
فاكر يامنة و فاكر الوش؟
إوعى تصدقها الدنيا..
غش فى غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كأن ماحدش غاب.
و اللي ماتوا حتة حتة
و نشفوا و هم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أول ما ينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
سيبها لهم بالحال و المال و انفد
إوعى تبص وراك.
الورث تراب
و حيطان الأيام طين
و عيالك بيك مش بيك عايشين..!!
يوووووووووه يا رمان..
مشوار طولان
و اللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر و حمر.
مش كنت جميلة يا واد ؟
مش كنت و كنت
و جَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية و نجية ماتوا وراحوا
و أنا اللي قعدت.
طيِّب يا زمان..!!
إوعى تعيش يوم واحد بعد عيالك
إوعى يا عبد الرحمن.
في الدنيا أوجاع و هموم أشكال والوان.
الناس ما بتعرفهاش.
أوعرهم لو حتعيش
بعد عيالك ما تموت.
ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة و حراجي القط..؟
آباي ماكنت شقي و عفريت
من دون كل الولادات.
كنت مخالف..
برّاوي..
و كنت مخبي في عينيك السحراوي
تملي حاجات.
زي الحداية ..
تخوي ع الحاجة .. و تطير .
من صغرك بضوافر واعرة .. و مناقير.
بس ماكنتش كداب.
و آديني استنيت في الدنيا
لما شعرك شاب..!!
قِدِم البيت.
اتهدت قبله بيوت و بيوت.
و أصيل هوه..
مستنيني لما أموت..!!
حاتيجي العيد الجاي؟
و اذا جيت
حاتجيني لجاي؟
و حتشرب مع يامنة الشاي .؟؟
حاجي ياعمة
وجيت..
لا لقيت يامنة
ولا البيت ..!! | 
أنت غير مسجل في شبكة إقتصاديات المتكاملة . للتسجيل الرجاء اضغط هنـا 
العرض العادي
